Дэлхийн улс орнууд цар тахлыг буулгаж авахын тулд вакцинд хамаг анхаарлаа хандуулж байна. Тиймдээ ч хүн амынхаа 60-70 хувийг дархлаажуулалтад хамруулчихаад байгаа цөөнгүй улс орон байгаа юм. Манай улсын хувьд нэлээн хэдэн сарын өмнөөс вакцин оруулж ирэх талаар яригдсан ч одоо л биелэлээ олох нь.

Засгийн газраас АНУ, Германы хамтарсан “Pfizer”, Оксфордын их сургуулийн “AstraZeneca”, Хятадын Синофарм, Оросын "Спутник V" вакциныг оруулж ирэхээр төлөвлөж, энэ сарын 22-ноос эхлэн дархаажуулалт хийгдэж гэж байна.

Гэвч вакцинжуулалттай зэрэгцээд зарим олны танил хүмүүс вакцинаас татгалзаж байгаагаа олон нийтийн сүлжээнд илэрхийлсэн нь иргэдийн санаа бодлыг хоёр хуваахад хүргээд байна. Тэд  “бүрэн судлагдаагүй вакцин хийлгэх нь халдвар  өртсөнөөс ч аюултай”, “гэр бүл үр хүүхдээ хамгаалж вакцин хийлгэхгүй” гэх шалтгаан хэлж байгаа бөгөөд түүнийг нь ч багагүй хүмүүс дэмжиж байгаа юм.

Засгийн газрын зүгээс асуудалд эхний ээлжинд ирэх Астразенека вакцины эхний тунг Ерөнхий сайд хийлгэж вакцин аюулгүй гэдгийг харуулна гэж байгаа бол хоёр дахь тунг Эрүүл мэндийн сайд хийлгэж салбарынхныгаа уриална гэдгээ нэгэн ярилцлагынхаа үеэр тодотгосон. Гэсэн ч иргэд вакцинаас татгалзвал хуульд заасны дагуу бичгээр баталгаажуулж авах аж.

Энэ талаар Эрүүл мэндийн сайд С.Энхболд “Вакцинжуулалтад хамрагдахаас татгалзсан иргэдээс бичгээр баталгаа авна. Харин вакцинд хамрагдсан иргэдэд сертификат олгоно. Энэ нь гадаад улс руу зорчиход албан ёсны баримт бичиг болно” хэмээн мэдэгджээ. Учир нь Дархлаажуулалтын тухай хуулийн 6.2.2-т “Сэргийлэх тарилгаас татгалзсан бол түүнийгээ бичгээр баталгаажуулах” гэж заасан байдаг аж.