Ардчилсан нам өнгөрсөн УИХ-ын сонгуулиас хойш “толгойгүй” яваа. Сонгуульд ялагдсан хариуцлагаа хүлээж С.Эрдэнэ намын даргынхаа тамгыг тухайн үеийн Ерөнхий нарийн бичгийн дарга Ц.Туваанд шилжүүлсэн ч өнөөх нь намаараа тоглочихсон. Улмаар дүрмийн бус тоглолт хийлээ хэмээн С.Эрдэнэ эргэн ирсэнээр АН-ын хямрал улам гүнзийрсэн. Хууль, шүүх цагдаа дээрээ тулж эргэсэн АН-ынхан сая нэг учраа олж, намын даргынхаа сунгааг зарлатал бас л шударга болж чадсангүй бололтой. Эрх мэдлээ үүрд хадгалж үлдэх эрмэлзэлтэй эксүүд нь сурсан зангаараа хороо найруулжээ. 

Ардчилсан намын даргын сунгаанд нийт 19 нэр дэвшигч бүртгүүлэхээр хандсан ч хоёр нэр дэвшигчийг нь бүртгэхээс татгалзаж, нэг нь нэрээ татжээ. Тодруулбал “АН-ын шинэчлэлийн хөдөлгөөн”-ий тэргүүн П.Галиндэв, УИХ-ын гишүүн Н.Алтанхуяг нарыг шаардлага хангахгүй гэж үзэн нэр дэвшигчээр бүртгэхээс татгалзсан бол О.Алтангэрэл нэрээ татсан байна.

П.Галиндэв, Н.Алтанхуяг нарын хувьд С.Эрдэнэ АН-ын дарга байхдаа намаасаа нэр дэвших боломжийг нь хаасан. Улмаар тэд УИХ-ын сонгуульд бие даан нэр дэвшиж, П.Галиндэв ялалт байгуулаагүй ч бие даан нэр дэвшигчидээс хамгийн их санал авсан бол Н.Алтанхуяг Орхон аймгаас УИХ-ын гишүүнээр сонгогдсон юм.

С.Эрдэнэ явсны дараа түүний "блок" хийсэн гишүүдэд нам нь нээлттэй болсон. Тэдний нэг Н.Алтанхуяг. Хэдийгээр тэрбээр намынхаа үйл ажиллагаанд оролцоогүй ч намын даргын сунгаанд өрсөлдөхөө эртнээс илэрхийлсэн. Гэвч тэрбээр дахиад л С.Эрдэнэ ба түүний нөхдийн “боолтод” оржээ. 

Учир нь Ц.Элбэгдорж, С.Эрдэнэ З.Энхболд нар хүч хавсран Н.Алтанхуягийг нэр дэвшүүлж болохгүй гэх зарлигийг дотоод Сонгуулийн хороондоо буулгасан гэх мэдээлэл байна. Намынхаа гишүүдийн эрх ашгийг давж, зоригтой дуугарсны шалтгаан нь Дотоод сонгуулийн хорооны дарга И.Мөнхжаргалтай холбоотой гэх. Тэрбээр З.Энхболдтой нэг нутаг бөгөөд түүний фракцид харьяалагддаг хүн юм байна.  Дотоод сонгуулийн хороо шийдвэрээ гаргаж чадахгүй хоёр өдөр болсон нь ч үүнтэй холбоотой гэдгийг намынх нь хэлж байна. 

Уг нь Ардчилсан намаас гишүүд нь ихийг хүлээдэг. Хямралд өртчихөөд байгаа намаа дахин сэргэж, хүчтэй сөрөг хүчин болохыг нь  тэсэн ядаж хүлээж буй. Гэвч намын даргын сунгаанаасаа эхлээд л хэл ам хэрүүл тэмцэл, үгсэн хуйвалдаанаар дүүрэн байх нь.