АН-ын даргын сунгаанд орохын тулд 93 сая төгрөг төлж байгаагаас болж зарим нэр дэвшигчид нэрээ татсан талаар нэр дэвшигч Т.Энхсайхан мэдээлэл хийлээ. 

Тэрбээр “Энэ сарын 5-ны өдөр АН-ын даргын сунгаанд нэр дэвших хүсэлт ирсний дагуу дотоод сонгуулийн хороонд материалаа бүрдүүлж өгсөн. Тухайн үед сонгуулийн зардал 74 сая төгрөг байсан ч  93 сая төгрөг болж нэмэгдсэн. Энэ мөнгийг би ах дүү, хамаатан садантайгаа нийлээд дотоод сонгуулийн хорооны дансанд хийхэд бэлэн байна. Гэвч нөхцөл байдал 93 сая төгрөг дээр дахин нэмэгдэх хандлагатай боллоо. 

Учир нь хүн хасагдах тоолонд мөнгөн дүн нэмэгдэх юм байна. Хэрэв хамгийн сүүлд 4 хүн үлдлээ гэхэд зөвхөн Дотоод сонгуулийн хорооны санд төвлөрүүлэх мөнгө нь нэг хүнээс дор хаяж 250- 300 сая төгрөг гарах юм байна. Үүнээс гадна 21 аймгаар явж, гишүүдтэйгээ уулзалт хийхэд нэлээд хэмжээний зардал орно.  Цааш хэдэн ч төгрөг болохыг таашгүй нь. 

Өөрөөр хэлбэл энэ бол өнөөх л өндөр босготой мөнгөний сонгууль болчихлоо. Тиймээс мөнгөний сонгуулийг эсэргүүцдэг хүний хувьд нэрээ татаж байна. 

Ер нь манай нэртэй улстөрчид хэзээ мөнгөтэй байсан юм бэ. Гэтэл одоо их хэмжээний мөнгө хаяж сонгуульд орчихоод түүнийгээ хаанаас яаж, олж авах гээд байдаг юм бэ. Мөнгөнийхөө шанд явж байгаа хүмүүс л Монгол улсыг тонон дээрэмдэж байна. Хатуухан хэлэхэд Монголын жинхэнэ эх орончдод улстөрийн үүд хаалга хаалттай байна.  Ядаж Ардчилсан нам мөнгөний сонгуулиа хамгийн түрүүнд болих хэрэгтэй" гэлээ.