УИХ-ын чуулганы нэгдсэн хуралдаанаар Монгол Улсын Үндсэн хуулийн цэцийн 2021 оны хоёрдугаар дүгнэлтийг хэлэлцэж байна. 

Хуралдааны үеэр гишүүд Ардчилсан намын дарга, УИХ-ын гишүүн Ц.Туваан АНУ-ын лобби бүлэгтэй хоёр сарын хугацаанд 50 мянган ам долларын гэрээ байгуулсан талаар мэдэгдлээ.

Энэ талаар УИХ-ын гишүүн Ц.Мөнх-Оргил:

- Сонгууль будлиулах ажлыг Ардчилсан нам хийж байна. Энэ дээр Ц.Туваан гишүүнээс тодруулга авмаар байна. АНУ-ын лобби буюу нөлөөллиийн бүлэгтэй 50 мянган ам.долларын гэрээг сонгуулийн хугацаанд байгуулжээ. 4 дүгээр сарын 12-ноос 6 дугаар сарын 12 хүртэл буюу Ерөнхийлөгчийн сонгуулийн үеэр гэсэн үг.  Энэ ямар учиртай гэрээ вэ. Энийгээ тайлбарлаач. Хууль зөрчсөн үйлдэл хийж болдог юм уу.


УИХ-ын гишүүн Ц.Туваан
- 50 мянган ам.доллар битгий хэл 50 ам.доллар ч хүнд төлөөгүй гэдгийг АН-ын зүгээс хариуцлагатайгаар хэлье. Манайх тийм баян нам биш. Ц.Мөнх-Оргил гишүүн андуурсан байх.

УИХ-ын гишүүн М.Оюунчимэг: 

- Гадны хэвлэлүүд Монгол улсын улстөрийн намын талаар ийм мэдээлэл гаргана гэдэг ноцтой асуудал. Ерөнхийлөгчийн сонгуульд нөлөөлөх гэсэн оролдлого. Арай ч ийм зүйл хийхгүй байх. Үүнийг анхаарлын гадна үлдээж болохгүй. 


УИХ-ын гишүүн Г.Дамдинням:

- УИХ-ын гишүүн Ц.Тувааны нэр орсон маш ноцтой асуудал хөндөгдөж байна. Энэ мэдээллийг гаргасан сайт бол 2017 онд онлайн сэтгүүлзүйн дээд шагнал, 2019 онд Олон улсын том шагнал авсан хууль бус лоббинуудыг ил гаргадагаараа алдартай сайт. Ц.Туваан гишүүн сая гарын үсэг зураагүй, тийм зүйл байхгүй гэж мэдэгдлээ. Гарын үсэгтэй баримт бичиг нь гараад ирчихсэн байна шүү дээ. Гадны лобби компаниудыг Монголын сонгуульд оролцуулж, өнгөт хувьсгал хийх гээд байгаа юмуу.  Улстөр, цар тахлын энэ эмзэг үед улстөрийн ийм увайгүй байдлаар хийх нь зөв ч юмуу. УИХ-аас ажлын хэсэг байгуулж, Ардчилсан намын АНУ-ын лобби компанитай хийсэн гэрээг шалгах нь зөв.