УИХ-ын Ёс зүй, сахилга хариуцлагын байнгын хорооноос "УИХ-ын гишүүний ёс зүйн дүрэм" болон УИХ-ын гишүүдийн ирцийн асуудлаар мэдээлэл хийлээ.

Б.Бат-Эрдэнэ:

- Өнгөрсөн 10 дугаар сард УИХ-ын чуулган 10 удаа хуралдсан. УИХ-ын 19 гишүүн хуралдаан таслаж, 30 гишүүн хоцорч, 57 гишүүн хуралдааныг огт таслаагүй байна.

- УИХ-ын гишүүн Ц.Анандбазар гурав, С.Амарсайхан, Х.Нямбаатар, Ц.Сэргэлэн, Н.Энхболд нар хоёр удаа тасалсан.

- УИХ-ын гишүүн Х.Ганхуяг , Б.Жавхлан, Ж.Мөнхбат,  С.Одонтуяа, Ш.Раднаасэд  Ц.Мөнх-Оргил,  Ц.Сандаг-Очир, Ч.Ундрам, Н.Учрал, Ж.Эрдэнэбат, Б.Чойжилсүрэн, Ч.Хүрэлбаатар, О.Цогтгэрэл тус тус нэг удаа тасалсан.

- УИХ-д 5 удаа сонгогдож ажиллахдаа Ёс зүйн дэд хороо хүний картанд хүрдэг, кнопыг очиж дардаг асуудлаар шаардлага тавьж ирсэн. Цаашид ч үүнийг шаардсаар байх болно. 

 - Өмнөх парламентын чуулганы хуралдаан дунджаар 54 минут хоцорч эхэлж байсан. 2020 оны УИХ-ын сонгуулийн үр дүнгээр байгуулагдсан парламент энэ хоцролтын хэмжээ дунджаар 7 минут болсон. 

- Цөөн хэдэн гишүүний ёс зүйгүй хариуцлагагүй байдлын улмаас бүх гишүүдийн нэр хүнд унаж байна.

- УИХ-ын даргын 45 дугаар захирамжаар УИХ-ын гишүүний ёс зүйн дүрмийн төслийг шинэчлэн боловсруулах үүрэг бүхий ажлын хэсгийг ахалж ажилласан. Энэ дүрэм УИХ-ын гишүүдийг өргөсөн тангарагтаа үнэнч ажиллахад нь тусалж аливаа зөрчлөөс урьдчилан сэргийлнэ. 

- Энэ бол зөвхөн энэ парламентын үйл хэрэг биш дараа дараагийн УИХ-ын үйл ажиллагааны жишиг болно. 

-  Шинэ  "УИХ-ын гишүүний ёс зүйн дүрэм"-ээр  хүндэтгэн үзэх шалтгаангүйгээр байнгын дэд, түр хорооны хуралдааныг  3 ба түүнээс дээш удаа тасалсан бол, 

хуралдааны цахим ирцэд бүртгүүлсэн дүнгээр хоцорсон буюу тасалсан цаг нь ажлын гурван өдрийн цагаас дээш гарсан бол, 

УИХ-ын Ёс зүй, сахилга хариуцлагын байнгын хорооны хуралдаанаар оруулж хариуцлага тооцох заалтыг оруулсан. Өмнө нь зөвхөн сануулаад өнгөрдөг байсан бол одоо цаашлаад хэвлэл мэдээллийн хэрэгслээр дамжуулж олон нийтээс уучлал гуйна.