Монгол улс эрчим хүчний импортод жилд дунджаар 400 гаруй тэрбум төгрөг зарцуулдаг талаар Ерөнхий сайд Л.Оюун-Эрдэнэ  МАН-ын XXX Их хурлын индэр дээрээс мэдэгдсэн. Ингэхдээ дулааны үйлдвэрлэл хэрэглээнээсээ 26 хувь, цахилгааны үйлдвэрлэл хэрэглээнээсээ 16 хувь хоцорсон.  1986 онд Дулааны 4-р цахилгаан станц баригдсанаас хойш эрчим хүчний нэг ч шинэ эх үүсвэр төрийн зүгээс бариагүй гэх мэдээллийг өгч,  Эрдэнэбүрэнгийн УЦС-ыг дуусгаж, баруун зүүн бүсийн эрчим хүчний хараат байдлыг хална,  Эгийн голын УЦС-ыг эхлүүлэхийн төлөө бүх боломжоо дайчлахаа “амласан”.

Гэвч Увс аймгийн Өмнөговь сумын ИТХ өнгөрсөн 11 дүгээр сарын 08-ны өдөр Эрдэнэбүрэнгийн усан цахилгаан станцыг зогсоох шийдвэр бүхий тогтоол гаргаж, төслийг шүүхэд өгөхөөр болжээ.

Тодруулбал, сумын иргэдийн амьдралд ноцтой хохирол учруулах, байгаль орчинд сөрөг нөлөө бүхий Эрдэнэбүрэнгийн усан цахилгаан станц барих төслийг шүүхэд өгөх, байгаль орчин, нийгмийн нөлөөллийн нарийвчилсан үнэлгээг хийсэн “Ньюгидро Проект”болон “ЭНКО” ХХК-ийг шүүхэд өгөх, эртний түүх, соёлын дурсгалт зүйлс устаж үгүй болж байгаа талаар Соёлын яаманд албан бичиг хүргүүлж, хариу авах, Хятадын элчин сайдын яаманд захидал илгээх, Хүний эрхийн комисст гомдол гаргах, олон улсын хүний эрхийн байгууллагад хандах зэрэг  саналуудыг гаргаж, хэрэгжүүлэн ажиллах, биелэлтийг сумын ИТХ-ын 12 дугаар сард болох хуралдаанд тайлахыг сумын Засаг дарга С.Өлзийд даалгасан байна.

БНХАУ-ын Засгийн газраас Монгол Улсын Засгийн газарт олгох нэг тэрбум ам.долларын хөнгөлөлттэй зээлийн хүрээнд Ховд гол дээр 90-100 МВт-ын хүчин чадал бүхий Эрдэнэ бүрэнгийн усан цахилгаан станц барихаар шийдвэрлэсэн. Станцыг Ховд аймгийн Эрдэнэбүрэн сумын нутаг дахь Шижигтийн хавцалд барих ч УЦС-ын усан сан бий болгох газар нь Увс аймгийн Өмнөговь сумын Улиастай багийн нутагт байршиж байгаа юм.

Гэвч дээрх нутаг дэвсгэрт амьдардаг 200 гаруй малчин өрх ийнхүү эсэргүүцэж, сумын ИТХ нь дэмжиж дээрх шийдвэрийг гаргасан байна. Хэрэв энэ станц баригдвал баруун бүсийн эрчим хүчний хангалтад ихээхэн ач холбогдолтой билээ.