Нийслэлийн Прокурорын газрын Хяналтын прокурор Д.Эрдэнэсувд дөнгөж сая мэдээлэл хийж, “Эрдэнэт” үйлдвэрийн 49 хувьтай холбоотой асуудлаар “Монголын зэс” корпараци, ХХБ-ны холбогдох удирдлагуудын хэргийн талаарх мэдээлэл өглөө. Төрийн мөнгөөр Эрдэнэт”-ийн 49 хувийг худалдан авсан гэх асуудалтай холбогдуулж, нэр бүхий хүмүүсийг яллагдагчаар татах санал ирүүлсэн ч прокуророос буцааж, нэмэлт мөрдөн байцаалтад буцаажээ. Прокурорын зүгээс “Д.Эрдэнэбилэг, О.Орхон, Ц.Пүрэвтүвшин, Г.Хүрэлбаатар нарыг залилах болон мөнгө угаах гэмт хэрэгт, мөн О.Орхон Г.Хүрэлбаатар нарыг банкны чадварыг алдагдуулсан гэсэн зүйл ангиар тус тус яллагдагчаар татах санал ирүүлсэн. Прокуророос хэргийг хянаад нэмэлт ажиллагаа хийлгэхээр буцаасан. Эрдэнэт үйлдвэрийн 49 хувийг 400 сая ам доллароор худалдаж авахдаа төрийн мөнгөөр худалдаж авсан гэх юм бол тухайн үед ажиллаж байсан албан тушаалтнуудын буруутай үйл ажиллагааны тухай яригдана. Хэрэгт авагдсан нотлох баримтууд одоогийн байдлаар дээрх нэр бүхий дөрвөн хүнийг ХХБ-наас зээл авсан, өгсөн гэсэн заалтаар шалгаж байгаа учраас нотлох баримтууд яллагдагчаар татах үндэслэлгүй байна гэж үзээд нарийвчлан шалгахаар буцаасан” гэлээ.