Монголын өдөр тутмын сонинуудын эрэн сурвалжлагч нэгдэл ТББ  өнөөдөр нэгэн ноцтой баримт дэлгэсэн. Тэд өмнө нь өмгөөлөгч Б.Баасанцогт нэр бүхий 11 шүүгчийн харилцах дансаар мөнгө шилжүүлсэн. Энэ асуудал нь илэрмэгц шүүгч нар Б.Баасанцогт руу “Зээлийн эргэн төлөлт” гэсэн утгаар буцаан шилжүүлсэн талаарх мэдээллийг хүргэсэн.

Харин энэ удаад өмгөөлөгч Б.Баасанцогт нь 2017 оны есдүгээр сараас 2021 оны нэгдүгээр сарын 27-ныг хүртэлх хугацаанд нэр бүхий 11 шүүгч, шүүхийн ажилтнуудын данс руу 47 220 000 /Дөчин долоон сая хоёр зуун хорин мянга/ төгрөг шилжүүлсэн баримтыг дэлгэсэн юм.

Тэгвэл уг мэдээллийг дагуу Шүүхийн Ерөнхий зөвлөл нэр холбогдсон шүүгчдэд хандаж албан бичиг илгээлээ.  

Тодруулбал Нийслэл дэх Захиргааны хэргийн анхан шатны шүүхийн шүүгч Ц.Одмаа, Хан-Уул дүүргийн иргэний хэргийн анхан шатны шүүхийн шүүгч Б.Мөнхбаяр, Хан-Уул дүүргийн иргэний хэргийн анхан шатны шүүхийн шүүгч Д.Энхцэцэг, Баянгол дүүргийн иргэний хэргийн анхан шатны шүүхийн шүүгч Ж.Эрдэнэчимэг нарт "Сүүлийн үед хэвлэлийн мэдээллийн хэрэгсэл, олон нийтийн цахим сүлжээгээр шүүгчид нэр бүхий өмгөөлөгчөөс мөнгө авсан тухай мэдээлэл гарч, шүүхэл итгэх иргэдийн итгэлийг алдагдуулж байгаад харамсаж байна. Дээрх нөхцөл байдлын улмаас шүүхийн байгууллага, нийт шүүгчдийн нэр хүнд, хараат бус байдал хөндөгдөж байх тул гарч буй асуудал үнэн бодитой эсэх, хууль тогтоомж, шүүгчийн ёс зүйн хэм хэмжээ зөрчсөн эсэхийг холбогдох эрх бүхий байгууллагад хандан өөрийн хүсэлтээр шалгуулж, шүүхэд итгэх иргэдийн итгэл, нийт шүүгчдийн нэр хүндийг хамгаалах талаар арга хэмжээ авч ажиллахыг мэдэгдье" гэжээ.