Шүүхийн мэдээлэл: 

Хан-Уул дүүргийн Прокурорын газраас яллагдагч Н.Түвшинбаярт холбогдуулан Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.1 дэх заалтад зааснаар “Хүний эрүүл мэндэд хүнд хохирол санаатай учруулах” гэмт хэрэгт яллах дүгнэлт үйлдэж ирүүлсэн эрүүгийн хэргийг Хан-Уул дүүргийн Эрүүгийн хэргийн анхан шатны шүүх 2021 оны 12 дугаар сарын 23-ны өдрийн шүүхийн урьдчилсан хэлэлцүүлгээр хянан хэлэлцээд Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1 дэх хэсгийн 1.2 дахь заалтад зааснаар “шүүх хуралдаанаар нөхөн гүйцэтгэх боломжгүй мөрдөн шалгах ажиллагаа хийлгэхээр хэргийг тус дүүргийн прокурорын газарт буцааж шийдвэрлэлээ.

Шүүхээс яллагдагч Н.Түвшинбаярт урьд авсан цагдан хорих таслан сэргийлэх арга хэмжээг прокурорт очтол хэвээр үргэлжлүүлж шийдвэрлэв.

Хэргийн талаар  Н.Түвшинбаярын өмгөөлөгч Л.Данзанноров: 

- Н.Түвшинбаярын хувьд гэм буруугийн тал дээр маргахгүй байгаа. Гарсан хохирлыг цаг тухайд нь төлсөн. Нийт гурван тэрбум төгрөгийн хохирлыг нөхөн төлсөн. Төлөхөөс ч аргагүй, хүний эрүүл мэндийн асуудал учир. Цаашдаа ч төлөх ёстой. Үүнийгээ маш сайн ойлгож ухамсарлаж байгаа, маш их гэмшиж байгаа. Хэргийн сая хянан хэлэлцээд нэмэлт мөрдөн байцаах ажиллагаа шаардлагатай байна гэж үзээд прокурорт буцаалаа.

- Хамгийн гол нь хохирогчийн эрүүл мэндэд маш их санаа зовж байгаа. Зарим хэвлэл мэдээллийн хэрэгслүүдийн мэдээлж байгаа шиг хохирол төлөхгүй байгаа юм шиг мэдээлж байгаа нь ташаа мэдээлэл гэдгийг хэлмээр байна.