Баянгол дүүргийн Улсын бүртгэлийн хэлтсийн даргын үүргийг түр орлон гүйцэтгэгч Н.Анхбаяраас гадаад пасспортын бүртгэлийн талаар тодрууллаа.

  - Бүртгэлийн байгууллага гадаад пасспортын зургийг өөрсдөө авч иргэдийг чирэгдүүлж байна гэсэн гомдол сүүлийн үед цахим орчинд нилээн шүүмжлэл дагуулж байна. Энэ талаар?

-  Улсын бүртгэлийн Ерөнхий газар, түүний харьяа салбар бүртгэлийн хэлтсүүд  өнгөрсөн 9 дүгээр сарын 30-ны өдрөөс эхлэн гадаад пасспортын зургийг өөрсдөө авч, бүртгэлээ хийж эхэлсэн. Энэ нь иргэд зурагчинд  төлбөр төлөхгүй, захиалсан пасспорт богино хугацаанд гарах давуу талтай. Учир нь Бүртгэлийн байгууллагын улсын бүртгэгч пасспортын зургийг авснаар онлайнаар захиалга үүсэх юм. Өмнө нь пасспортын бүртгэлийн захиалгыг цаасан байдлаар хүргэдэг, түгээдэг байсан. Харин одоо  зөвхөн түгээдэг хэлбэрт шилжсэнээр цаг хугацаа, бичиг цаасны зардлуудыг хэмнэж байна.

-  Гадаад пасспортын зургийг заавал бүртгэлийн байгууллага өөрсдөө авах шаардлага бий юу, төлбөр тооцоог банкинд тушааж дараалал үүсэж байгааг хэрхэн шийдвэрлэж байгаа вэ?

- Гадаад пасспортын зургийг авч бүртгүүлэх нь үндсэндээ бүртгэлийн нэг хэсэг гэж ойлгож болно. Төлбөр тооцооны хувьд бид киоск машин,  банкинд тушаах хэлбэрүүдээр шийдээд явж байна.

-  Гадаад пасспортын үйлчилгээг очер дараалалгүй болгох тал дээр ямар арга хэмжээ авч байгаа вэ?

-  Улсын бүртгэлийн байгууллага нь Нийслэл дэх 9 дүүрэг түүний харьяа нэг цэгийн үйлчилгээний салбарууд болон орон нутагт гадаад пасспортын үйлчилгээгээ нэгэн зэрэг үзүүлээд явж байна. Өнөөдрийн байдлаар Баянгол дүүргийн бүртгэлийн хэлтэс болон Нийслэлийн үйлчилгээний  нэгдсэн төв болох Е-Март салбарт пасспортын ачаалал харьцангуй бага, бүртгэлийн хэвийн явагдаж байна. Иргэддээ хандаж хэлэхэд та бүхэн аль болох өглөө эрт ирж үйлчлүүлж байгаарай гэж захья.