Нийслэлийн Засаг дарга асан Д.Сумъяабазар албан тушаалаасаа чөлөөлөгдөж байгаа талаараа мэдээлэл хийсэн. Тус хэвлэлийн хурлын үеэр “Автобусны тендерийн тухайд хот өөрийн эрх зүйн хүрээнд л зохион байгуулсан. "Тэнүүн-Огоо" нь байна уу, "Эрдэм транс" нь байна уу мэдэхгүй. Хувийн хэвшлийг кластераар хөгжүүлэх ёстой гэдэг үзэл санаагаар Д.Амарбаясгалан дарга өөрөө уулзуулж, захиж байсан юм шүү. Процесс дээр нь алдаа гарсан юм байна...Нийслэлийн МАН-ын хороо бол миний байгуулсан намын хороо. Би Орон нутгийн 2020 оны сонгуульд намаа ганцаараа удирдаж орсон. Д.Амарбаясгалан даргаас ямар ч чиглэл авч байгаагүй” хэмээсэн билээ.

Тэгвэл энэ талаар  ЗГХЭГ-ын даргын Хэвлэлийн төлөөлөгч П.Энхжин өнөөдөр тайлбар хийлээ.

П.ЭНХЖИН: 

- 2022 оны аравдугаар сарын 08-нд Ерөнхий сайд Л.Оюун-Эрдэнэ, ЗГХЭГ-ын дарга Д.Амарбаясгалан, Хот хариуцсан сайд Ж.Сүхбаатар, Нийслэлийн ЗД Д.Сумьяабазар нар “Зорчигч тээврийн нэгтгэл” ОНӨААТҮГ-ын 2-р баазад ажиллаж, нийтийн тээврийнхэнтэй анх удаа уулзсан.

Үүнээс цааш ажлын хэсгийн уулзалт нэг удаа болсон бөгөөд миний хувьд хэвлэлийн төлөөлөгчийн хувиар тус уулзалтад оролцоход Нийслэлийн засаг дарга Д.Сумьяабазар байгаагүй.

Тус хурал 2022 оны аравдугаар сарын 14-нд болж төр, хувийн хэвшлийн аль нь үйлчилгээ явуулах нь гол биш хамгийн чухал нь иргэдэд тав тухтай, хүртээмжтэй үйлчилгээ үзүүлэх нь чухал учраас нийтийн тээврийг либералчлах асуудлыг хөндсөн. 

17 компани нэг корпораци болж, хувь эзэмших зарчмаар ил тод нээлттэй ажиллая гэсэн саналыг ЗГХЭГ-ын дарга Д.Амарбаясгалан тавьсан.

Гэвч энэ асуудал ажил хэрэг болж чадаагүй гэдгийг энд тодотгоё. Уг хуралд Хот хариуцсан сайд Ж.Сүхбаатар, Нийслэлийн Цагдаагийн газрын дарга, нийслэлийн нийтийн тээвэр хариуцсан удирдлага, нийтийн тээврийн салбарынхан оролцсон зургийг хавсаргав.

Д.Сумьяабазар даргын ярьсан шиг Тэнүүн-Огоо гэх компанитай Д.Амарбаясгалан дарга анх уулзуулсан гээд байгаа явдал болоогүй бөгөөд 2022 оны аравдугаар сарын 08-нд Ерөнхий сайд нийтийн тээврийнхэнтэй уулзахад ЗГХЭГ-н дарга болон Хотын дарга байлцсанаас өөрөөр хоорондын уулзалт болоогүй гэдгийг хэлмээр байна" гэжээ.