Гол агуулга:

  • Улсын Дээд шүүхэд бүртгэлтэй 37 намаас 2025 оны IV улирлын тайланг 29 нам СЕХ-д хүргүүлжээ.

  • Тайлан өгсөн намуудаас 14 нам хандив авсан, 15 нам хандив аваагүй гэж мэдээлсэн байна.

  • Хандивын мэдээллийг m-election.mn/handiv холбоосоор олон нийтэд нээлттэй байршуулж байна.

Улс төрийн намын тухай хуулийн 34.1-т зааснаар нам иргэн, хуулийн этгээдээс хүлээн авсан хандивын мэдээллээ улирал тутам нээлттэй өгөгдлийн санд байршуулж, Сонгуулийн ерөнхий хороонд хүргүүлэх үүрэгтэй. Энэ зохицуулалтын хүрээнд 2025 оны IV улирлын тайланг 37 намаас 29 нь хүргүүлж, 14 нам хандив хүлээн авсан байна.

Хандивын хэмжээгээр хэд хэдэн намын дүн анхаарал татаж байна. Иргэнээс мөнгөн хандив хэлбэрээр

Монгол Ардын Нам 310 сая төгрөг,

Ардчилсан Нам 204 сая төгрөг, 

Монголын Ногоон Нам 134 сая төгрөг, 

Иргэний Зориг Ногоон Нам 66 сая төгрөг тус тус тайлагнажээ. 

ШИНЭ нам иргэнээс 128 сая төгрөгийн мөнгөн, нэмээд 6.5 сая төгрөгийн мөнгөн бус хандив тусгасан байна.

Намуудын тайланд мөнгө, мөнгөн бус хэлбэрийн хандив зэрэгцэн бүртгэгдсэн тохиолдлууд байна. 

ХҮН нам нийтдээ 282 сая төгрөг (иргэнээс 114 сая, хуулийн этгээдээс 139 сая, мөнгөн бус 27.5 сая) хандив авснаа мэдээлсэн дүн гарчээ.

 Монгол Үндэсний Ардчилсан Нам 35 сая төгрөгийн мөнгөн, 7.993 сая төгрөгийн мөнгөн бус хандив тайлагнасан байна.

Хандивын дэлгэрэнгүй мэдээллийг СЕХ-ны цахим хуудсаар дамжуулан ил тод, нээлттэй авах боломжтой гэж мэдээлэлд дурдсан байна.