Зам, тээврийн хөгжлийн яамны Авто замын бодлогын хэрэгжилтийг зохицуулах газрын Замын ашиглалт, засварын хэлтсийн дарга Х.Оргил-Эрдэнэ өнгөрсөн арванхоёрдугаар сарын 30-нд өрөөндөө 20 мянган юанийн хахууль авч байгаад үйлдэл дээрээ баригдсан талаар бид цаг тухайд нь мэдээлж байсан.

 

Тэрбээр Улаанбаатар-Дархан чиглэлийн авто замыг барьж буй БНХАУ-ын гүйцэтгэгч компанийн хятад иргэнээс ийнхүү авлига авч байгаад баригдсан. 

 

Хэдийгээр АТГ-аас түүнийг баривчилж, саатуулсан ч шүүх цагдан хориулах тухай прокурорын санал баримтаар нотлогдоогүй гэсэн үндэслэлээр суллаж, гадуур шалгаж байгаа. Хэргийн талаар Х.Оргил-Эрдэнийн өмгөөлөгч Б.Баатарсайхан “Миний үйлчлүүлэгч хахууль аваагүй. БНХАУ-ын иргэн өрөөнд нь баглаатай зүйл орхиод зугтаасан. Энэ үед АТГ-ынхан орж ирсэн. Боодол дотор юу байгааг мэдээгүй, үзээгүй” хэмээн хэвлэлд ярьсан байдаг.


Тэгвэл Х.Оргил-Эрдэний хахууль авч байгаа бичлэг байгаа талаар Үндэсний шуудан сонин мэдээлжээ.  Тэд албаны баттай эх сурвалж “Х.Оргил-Эрдэнийн хятад иргэдтэй утсаар удаа дараа холбогдож, уулзаж, мөнгө авч байгаа бичлэг албаныханд байгаа. Өмгөөлөгчийнх нь ярьсан шиг боодолтой зүйл орхиж явсан хүн байхгүй” хэмээн мэдээлсэн байна.