Тагнуулын ерөнхий газрын дарга асан Б.Хурцыг өчигдөр шөнө саатуулан, тайлбар авсан талаар бид мэдээлсэн. Тэгвэл энэ талаар албан ёсны эх сурвалж буюу ЦЕГ-ын Хэвлэл мэдээллийн төвийн дарга, цагдаагийн хурандаа Б.Баатархүү мэдээлэл өглөө. Б.Баатархүү “Авлигатай тэмцэх газар /АТГ/-т 2002 оны Эрүүгийн хуулийн 133.1 дэх зүйлийн гүйцэтгэх ажиллагаа, хууль тогтоомж зөрчих гэдэг заалтаар эрүүгийн хэрэг үүсгэн шалгаж байсан хэргийг Улсын ерөнхий прокуророос харьяалал тогтоож, 2019 оны дөрөвдүгээр сарын 19-нд буюу өнгөрөгч баасан гарагт Цагдаагийн ерөнхий газрын Мөрдөн байцаах албанд шилжүүлэн ирсэн. Түүн дагуу мөрдөн шалгах ажиллагаа явагдаж байна. Уг хэргийн дагуу өчигдөр /2019.04.23/ Б.Хурцыг хойшлуулашгүйгээр саатуулсан. Үргэлжлүүлэн цагдан хорих асуудлаар прокурорын газарт санал хүргүүлээд байна” гэв.