Эрүүл мэндийн яамнаас ээлжит мэдээллээ хийлээ. Хурлын эхэнд  ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл “Өнөөдрийн байдлаар дэлхийн 173 оронд COVID-19  халдвар бүртгэгдээд байна. Өчигдрөөс хойш 5 оронд өвчлөл шинээр бүртгэгдлээ. БНСУ, Иран, Итали, АНУ, Герман, Испани, Дани, Франц зэрэг улсуудад халдвар эрчимтэй тархаж байна.  COVID-19  халдвар бүртгэгдсэн эхний гурван сард 100 гаруй мянган тохиолдол бүртгэгдэж байсан бол сүүлийн 12 хоногт дэлхийд дахин 100 мянган хүн шинээр халдвар авлаа. Европоос Ази тив рүү халдвар шинээр зөөвөрлөгдөн орж ирж байна. Азийн хоёр дахь том тархалт гарах нь гэж судлаачид үзэж байна. Учир нь Сингапурт 33, БНХАУ-д 140 шинэ тохиолдол гаднаас зөөвөрлөгдөн орж иржээ. Тиймээс Ази тивд халдвар дахин тархах эрсдэл байгаа учир урьчилан сэргийлэх арга хэмжээнийхээ эрчийг сулруулж болохгүй гэдгийг ДЭМБ-аас анхааруулж байна”гэлээ.