Өмнөговь аймгийн Шүүхийн шийдвэр гүйцэтгэх газрын дэд дарга бусдын гарт амиа алджээ. Талийгаач нь тус аймагт ажиллаж, амьдардаг ч хэрэг гардагийн өмнөх өдөр нийслэл хотод хувийн ажлаар ирсэн байжээ. Тус өдөр найзындаа зочилж, улмаар хоорондоо маргалдсаны улмаас сэжигтэн хохирогчийг найман удаа хутгалж, амийг нь хороосон байна. Хан-Уул дүүргийн 10-р хороонд байрлах “Буянт-Ухаа-2” хороололд гарсан энэ хэргийн талаар Цагдаагийн ерөнхий газраас тодруулахад “Ийм хэрэг гарсан нь үнэн. Ахуйн хүрээнд үйлдэгдсэн уг хэргийг Хан-Уул дүүргийн цагдаагийн хоёрдугаар хэлтэст Эрүүгийн хэрэг үүсгэн шалгаж байна” гэв.