Баян-Өлгий аймгийн ИТХ-ын төлөөлөгч, МАН-ын бүлгийн дарга Х.Нурболат нь  хуурамч дипломтой болох нь тогтоогджээ. Х.Нурболат нь  Алтайн техникийн их сургуульд ичнээгээр сурч байжээ. Гэвч тэрбээр сургуулиа төгсөж чадаагүй, диплом аваагүй болохыг ОХУ-ын Барвалийн шүүхээс тогтоосон байна. Уг хурлын тэмдэглэл Хууль зүй, дотоод хэргийн яамаар дамжиж иржээ.

Гэвч уг хэргийг Баян-Өлгий аймгийн Прокурорын газар хаажээ. Тодруулбал тус газраас  Х.Нурболат нь хуурамч дипломтай гэх хэрэг нь хөнгөн хэмээн үзсэн байна.

Х.Нурболат нь Баян-Өлгий аймгийн тендерийн тэрбумтан гэх мэдээлэл цацагдаад удаж буй. Тэрбээр аавынхаа үүсгэн байгуулсан “Мурап” ХХК-д 2006-2020 он хүртэл ажилласан бөгөөд уг компаниараа дамжуулан Баян-Өлгий аймагт баригдах сургууль, цэцэрлэгийн болон барилгуудын тендерийг ямар ч сонгон шалгаруулалтгүйгээр авдаг байжээ.

Харин 2020 оноос хойш аймгийн ИТХ-д сонгогдсон цагаасаа эхлэн өөрийн хамаарал бүхий компанидаа бүр тэрбумын төсөвтэй тендерүүдийг шууд авдаг болсон байна. Ингэхдээ тендерийнхээ санхүүжилтыг төсвөөс авдаг ч барилгуудаа дутуу гүйцэтгэлтэйгээр царцаачихдаг, Цагааннуур боомтын барилгын ажлын тендерийг авсаныхаа дараа өөрийн төрсөн дүүгээ боомтын Гаалийн газрын дарга болгосон зэрэг асар их ашиг сонирхолын зөрчилтэй талаар мэдээлэгдээд байгаа билээ.