Гол агуулга:

  • Зөрчлийн 96.5% (170,816)-ийг газар дээр нь шийдвэрлэж, 1.2% (2,109)-ийг хялбаршуулсан журмаар торгож, 1% (1,809)-д хэрэг нээжээ.

  • Зөрчлөөс учирсан хохирол 1.42 тэрбум төгрөг, үүнээс 18.1% (254.6 сая төгрөг)-ийг нөхөн төлүүлсэн байна.

  • Бүртгэгдсэн зөрчлийн 96.7% (169,528) нь замын хөдөлгөөний зөрчил эзэлжээ.

Прокурорын байгууллага 2026 оны 3 дугаар сарын 2-ноос 9-ний хооронд улсын хэмжээнд зөрчил шалган шийдвэрлэх эрх бүхий албан тушаалтны хүлээн авсан 177,059 зөрчлийн гомдол, мэдээллийг Зөрчлийн бүртгэл, мэдээллийн нэгдсэн санд бүртгэсэн гэж мэдээлэв.

Бүртгэгдсэн гомдол, мэдээллээс 170,816 (96.5%)-ийг газар дээр нь шийдвэрлэсэн бол 2,109 (1.2%)-ийг бүртгэлд авч хялбаршуулсан журмаар торгож, 1,809 (1%)-д зөрчлийн хэрэг бүртгэлтийн хэрэг нээжээ.

Прокурор эрх бүхий албан тушаалтан гомдол, мэдээлэл хүлээн авахаас татгалзсан 1,936 шийдвэрийг хянаж, 91 (4.7%)-ийг хүчингүй болгон зөрчлийн хэрэг нээж, холбогдох байгууллагад шилжүүлсэн байна. Мөн хэрэгсэхгүй болгосон 103 шийдвэрийг хянаж, 7 (6.8%)-ийг хүчингүй болгон нэмэлт ажиллагаа хийлгэхээр буцааж, 3 (2.9%) тохиолдолд эрүүгийн хэрэг үүсгэж яллагдагчаар татсан гэж мэдээлэв.

Зөрчлийн улмаас нийт 1,422,925,695 төгрөгийн хохирол учирснаас 254,637,343 төгрөг буюу 18.1%-ийг шалган шийдвэрлэх ажиллагааны явцад нөхөн төлүүлжээ. Бүртгэгдсэн зөрчлийн дийлэнх нь замын хөдөлгөөний аюулгүй байдлын тухай хууль зөрчсөн зөрчил (96.7%) байна.