Хууль зүй, дотоод хэргийн сайдаар томилогдсон С.Амарсайхан салбарын томилгоо, бүтэц зохион байгуулалтад өөрчлөлт хийхээ ил тод илэрхийлсэн. Тэрбээр Цагдаагийн ерөнхий газрын дэд дарга нарыг өөрчлөх асуудлыг хөндөж, энэ талаар албан уулзалтын үеэр байр сууриа илэрхийлжээ.

Тодруулбал, Засгийн газрын хуралдааны үеэр “Дэд сайд Д.Мөнх-Эрдэнэтэй сайдын хувиар хамтран ажиллах боломжгүй” гэдгээ мэдэгдсэн байна. Харин Ерөнхий сайд Н.Учрал уг асуудлыг одоогоор шийдвэрлэх боломжгүй, намын Удирдах зөвлөлөөр хэлэлцэх шаардлагатай гэж үзэн хойшлуулсан гэх мэдээлэл байна.


Дэд сайд Д.Мөнх-Эрдэнийн хувьд Засгийн газрын хуралдаанаас гарсны дараа сэтгүүлчдэд “Ажлаа үргэлжлүүлнэ” гэсэн товч тайлбар өгөөд өнгөрсөн ч одоогоор сайд, дэд сайдын харилцаа хэвийн бус байгаа талаар эх сурвалжууд мэдээлж байна.

Үүнтэй зэрэгцэн Ерөнхий сайд асан Л.Оюун-Эрдэнэ Авлигатай тэмцэх газарт мэдүүлэг өгөх үеэрээ “Бодь” групптэй холбоотой асуудлаар Д.Мөнх-Эрдэнэтэй холбоотой байж болзошгүй нөхцөл байдлын талаар мэдээлэл өгч, холбогдох гэрчүүдийн нэрийг дурдсан гэх мэдээлэл гарсан.

Мөн Тавантолгой–Гашуунсухайт чиглэлийн төмөр замын төсөлд оролцож байсан А.Амундра Монголын хууль хяналтын байгууллагаас гэрчийн хамгаалалт авбал эх орондоо ирж мэдүүлэг өгөх хүсэлт гаргасан. Тэрбээр өөрийн цахим хуудсаар дамжуулан уг асуудалтай холбоотой гэх зарим мэдээллийг нийтэлсэн нь олон нийтийн анхаарлыг татаж байгаа юм.